2026 гъэм, мэлыжьыхьым и 13-м, тхьэмахуэ нэхум и блыщхьэм, Пятигорск, Черкесск щIыналъэхэм я архиепископ Феофилакт тхьэлъэIу литургие щригъэкIуэкIащ Кисловодск къалэм и Никольскэ соборым.
Щоджэн нэхъыщхьэм къулыкъур драгъэкIуэкIащ: Пятигорск епархием Кисловодск щиIэ округым и благочиннэ щоджэн нэхъыжь Знаменский Иоанн, Епархием щихъхэр канон щIынымкIэ и комиссэм и унафэщI иеромонах Елевферий (Казаков), Успенскэ Второафонскэ Бештаурскэ цIыхухъу къулъшырыфым и благочиннэ иеромонах Иоанн (Галумов), Кисловодск благочинием и щоджэнхэр. Къардэн къулыкъур иригъэкIуэкIащ къардэн нэхъыжь Кубэ Димитрий.
Пастыр нэхъыщхьэм и гъусэу Тхьэ елъэIуну зэхуэсащ «Основы православной культуры» дерсыр щрагъэдж Чристэн Свято-Никольскэ классическэ гимназием и еджакIуэхэмрэ курыт еджапIэхэм я гъэсэнхэмрэ, члисэм екIуалIэхэр, къалэ-зыгъэпсэхупIэм и хьэщIэхэр. Щихънагъым IущIащ Чристэн гимназием и къэзакъ ныбжьыщIэхэр.
ТхьэлъэIу литургие уэрэдхэр ягъэзэщIащ гъэсэныгъэ лэжьыгъэхэмкIэ унафэщIым и къуэдзэ Синявская Татьянэрэ члисэ уэрэдхэр жыIэнымкIэ егъэджакIуэ Игнатенкэ Еленэрэ. Гимназием и гъэсэн псоми Христос и щэхухэм зыхагъэгъуэзащ.
IутIыж зэгъусэ тхьэлъэIу нэужьым, щихънагъ Феофилакт Пастыр нэхъыщхьэм и псалъэкIэ захуигъэзащ тхьэлъэIум хэтхэм. Абы жиIащ:
«…Тхьэм къыбгъэдэкIыу фIэщхъуныгъэ, гъащIэр нэхъ быдэ зыщIын тыгъэ фиIэну сынывохъуэхъу. ЕджакIуэхэм щIэныгъэм ехъулIэныгъэ щаIэну Тхьэм солъэIу, ЛIахэм къахэтэджыкIыжа Христос фи щIэныгъэр тыгъэфI хуэхъуну, фи адэ-анэхэми ар я гуфIэгъуэ хъуну зыфхузогъазэ. Зэгъусэ тхьэлъэIум нобэ щызэхуэса псоми Христос лIахэм къазэрыхэтэджыкIыжам и гуфIэгъуэкIэ сохъуэхъу..., ЛIахэм къахэтэджыкIыжа Христос и гуфIэгъуэр ди Iуэхухэм, ди фIэщхъуныгъэм щытлъагъуну.
IутIыж гуфIэгъуэр вдэзгуэшыну си гуапэщ, ар куэдкIэ бэгъуэну, нобэ ди члисэм и мызакъуэу къалэхэм, къуажэхэм, станицэхэм щызэбграгъэх хъыбарыфIым хуэдэу. Зым адрейм лъэдгъэIэсынщ ар макъкIэ, гукIэ, фIэщхъуныгъэкIэ, IуэхукIэ, гъащIэкIэ...».
Архиепископ Феофилакт ехъуэхъуащ гимназием и унафэщIымрэ и еджакIуэхэмрэ. Пастыр нэхъыщхьэм фIыщIэ хуищIащ унафэщIым икIи сабийхэм IэфIыкIэхэр яритащ.