2026 гъэм шыщхьэуӏум и 1-м Пятигорскрэ Черкесскрэ я архиепископ Феофилактрэ Куржы псом И Католикос-Патриарх Лъапӏэ Шио III-рэ Я нэфӏ къыщыхуауэ Кисловодск щаухуэ апостол пэлъытэ Нинэ, иверием и узэщӏакӏуэм, и члисэм япэу Тхьэлъэӏу литургие щрагъэкӏуэкӏащ. Тхьэлъэӏур щекӏуэкӏащ щихъ Ургебадзе Джэбрэӏил И ӏыхьэм, Урыс, Куржы Чристэн Члисэхэм я дин лэжьакӏуэхэр хэту.
Литургием и унафэщӏу щытащ Кисловодск члисэ округым и благочиннэ протоиерей Знаменский Иоанн. Абы къыдэлэжьащ округым и дин лэжьакӏуэ, Крестовоздвиженскэ члисэм и унафэщӏ протоиерей Лиманов Гермоген, иерей Янковский Давид, щоджэн Кереселидзе Нухь, Лобжанидзе Павел, Лобжанидзе Даниил сымэ.
Тхьэлъэӏум папщӏэ Тхьэ елъэӏуащ Кисловодск къалэ-курортым и Думэм и унафэщӏым и къуэдзэ Гордеев Иван, яухуэ члисэм и ктитор Лобжанидзе Павел, куржы зэгухьэныгъэм и унафэщӏ, Ставрополь крайм и губернаторым деж лъэпкъ ӏуэхухэмкӏэ щыӏэ Советым хэт Лобжанидзе Пётр, псапащӏэхэр, члисэр зыухуэхэр, куржы зэгухьэныгъэм и лӏыкӏуэхэр, къалэм щыпсэухэмрэ хьэщӏэхэмрэ.
Литургиер щиухым протоиерей Знаменский Иоанн фӏэщхъуныгъэ зиӏэхэм ехъуэхъуащ щихъ Саровский Серафим и фэеплъ махуэмкӏэ икӏи къызэхуэсахэм ӏутӏыж макъкӏэ фӏэхъус ярихащ: «Мэсихь Къэтэджыж!». Абы къыхигъэщащ Урыс, Куржы Чристэн Члисэхэм урысыбзэкӏи куржыбзэкӏи зэгъусэу тхьэ зэрелъэӏуар лъэпкъхэм я псэкупсэ зэкъуэтыныгъэмрэ пщӏэ зэрызэхуащӏымрэ щыхьэт зэрытехъуэр.
Щихъ Саровский Серафим теухуа уазкӏэ зыхуигъэзащ протоиерей Лиманов Гермоген. Абы ягу къигъэкӏыжащ щихъым Тхьэмрэ гъунэгъухэмрэ яхуиӏэ лъагъуныгъэр.
Тхьэлъэӏу нэужьым благочиннэм дин-лэжьакӏуэхэм фӏыщӏэ яхуищӏащ зэгъусэу тхьэ зэрелъэӏуам папщӏэ, ухуэныгъэм и нэӏэм щӏэтхэм — члисэр ухуэным ехьэлӏа лэжьыгъэхэм папщӏэ. Абы и жэуапу Куржы Чристэн Члисэм и лӏыкӏуэхэм архиепископ Феофилакт фӏыщӏэ хуащӏащ хьэщӏагъэ зэрырихам, яухуэ члисэм япэ тхьэлъэӏур щригъэкӏуэкӏыну ӏэмал зэриӏэм папщӏэ.
Протоиерей Лобжанидзе Павел члисэм тыгъэ хуищӏащ щихъ Ургебадзе Джэбрэӏил и хьэдэкъупщхьэхэм щыщ, апостол пэлъытэ Нинэ лъапӏэм и щхьэцыр, Къегъэлакӏуэмрэ Псыхуабэ и тхьэнапэмрэ.
Фӏэщхъуныгъэ зиӏэхэр лъапӏэныгъэхэм зыкӏэращӏащ, псы лъапӏэ траутхэныр къащтэри, Псыхуабэ и тхьэнапэхэмрэ куржы щихъхэмрэ тыгъэу иратащ.
Яухуэ члисэм япэу Зэгъусэу Литургиер Кисловодск и чыристанхэм я дежкӏэ мыхьэнэшхуэ зиӏэ ӏуэхугъуэ хъуащ. Абы къыхигъэщхьэхукӏащ Урыс, Куржы Чристэн Члисэхэм я псэкупсэ зэкъуэтыныгъэмрэ лъэпкъхэм илъэс куэдкӏэ я зэныбжьэгъугъэмрэ. Япэ тхьэлъэӏум екӏуэлӏапӏэ гъащӏэм щӏэдзапӏэ хуэхъуащ. Адэкӏэ члисэм къыщызэӏуахыну я мурадщ бзэмрэ хабзэмрэ яхъумэн папщӏэ куржы щэнхабзэ центр.