2026 гъэм фокӏадэм и 16-17-хэм Москварэ Урысей псомрэ я Патриарх Лъапӏэ Кирилл и нэфӏ къыщыхуауэ апостол пэлъытэ щихъхэу Кириллрэ Мефодийрэ я цӏэр зезыхьэ Члисэпсо аспирантурэмрэ докторантурэмрэ щекӏуэкӏащ тутнакъэщ дин лэжьакӏуэхэм я щӏэныгъэм щыхагъахъуэ курсхэр. Егъэджэныгъэр траухуащ «Урысей Федерацэм и УИС-м тезырхэр щагъэзэкӏуэж и ӏуэхущӏапӏэхэм Пастыр къулыкъу щыщӏэн» темэм.
Москва къэкӏуащ Урыс Чристэн Члисэм и епархие 32-м щыщ дин лэжьакӏуэ 55-рэ. Программэм лекцэхэр, семинархэр, стӏол хъурейхэр хэтт.
Пастырхэм зыщагъэгъуэзащ Члисэм тутнакъэщ къулыкъум и иджырей унэтӏыныгъэхэм, уголовнэ-гъэзэщӏакӏуэ системэм и лэжьыгъэм хэлъ щхьэхуэныгъэхэм, законодательствэм зэрызихъуэжым. Дин лэжьакӏуэхэр апхуэдэу тепсэлъыхьащ тезырхэр щагъэзэкӏуэж колониехэм, следственнэ изоляторхэм, лъэхъуэщхэм суд зытращӏыхьахэр псэкӏэ гъэшхэным, пастыр лэжьыгъэм и зэфӏэкӏхэмкӏэ зэхъуэжащ.
Пятигорск епархиер курсхэм щигъэлъэгъуащ ӏэщэкӏэ Зэщӏэузэда къарухэм, хабзэхъумэ ӏэнатӏэхэм, пенитенциар ӏуэхущӏапӏэхэм ядэлэжьэнымкӏэ епархием и къудамэм и лэжьакӏуэ иерей Молдованов Евгений. Щоджэным псэкӏэ егъашхэ Къэбэрдей-Балъкъэр Республикэм и КП №5-м и ФКУ-м суд зытращӏыхьахэр.
Тутнакъэщ къулыкъумкӏэ Синод къудамэм и унафэщӏ иерей Марковский Кирилл тепсэлъыхьащ залымыгъэкӏэ щаӏыгъ щӏыпӏэхэм пастыр къулыкъум хэлъ щхьэхуэныгъэхэм.
Абы хэтахэм я пащхьэ къыщыпсэлъащ УРЫСЕЙ ФСИН-м и лэжьакӏуэхэри. УРЫСЕЙ ФСИН-м гъэсэныгъэ, социальнэ, психологие лэжьыгъэмкӏэ и Управленэм фӏэщхъуныгъэ зиӏэхэм ядэлэжьэныр къызэгъэпэщынымкӏэ и къудамэм и унафэщӏ Гуров Сергей тепсэлъыхьащ ӏуэхущӏапӏэр дин зэгухьэныгъэхэм зэрадэлажьэм. Абы къигъэнэӏуащ УИС ӏуэхущӏапӏэхэм я щӏыналъэм щыӏэ члисэхэмрэ тхьэлъэӏу пэшхэмрэ режим унафэхэр зэрыщагъэзащӏэм хэлъ щхьэхуэныгъэхэр.
УРЫСЕЙ ФСИН-м и УВСПР-м психологие лэжьыгъэр къызэгъэпэщынымкӏэ и къудамэм и унафэщӏым и къуэдзэ Бакунинэ Татьянэ къыддэгуэшащ шэч зыхуащӏхэм, ягъэкъуаншэхэм, суд зытращӏыхьахэм зэӏыхьэныгъэ яхэлъыным зыщыхъумэнымкӏэ пенитенциарнэ психологхэмрэ тутнакъэщ дин лэжьакӏуэхэмрэ зэрызэдэлэжьэну зэфӏэкӏымкӏэ.
Урысей ФСИН-м и Академием суд зытращӏыхьахэм уголовнэ-гъэзэщӏакӏуэ хабзэмрэ гъэсэныгъэ лэжьыгъэр къахузэгъэпэщынымкӏэ и кафедрэм и егъэджакӏуэ Соколов Александр тепсэлъыхьащ тезырхэр щагъэзэкӏуэж ӏуэхущӏапӏэхэм я къудамэхэмрэ къулыкъущӏапӏэхэмрэ я лэжьыгъэм хэлъ щхьэхуэныгъэхэм.
Сретенскэ духовнэ академием и егъэджакӏуэ нэхъыжь, чристэн диным кӏэрыхуахэм члисэ реабилитацэмкӏэ я комиссэм и эксперт Москва къалэм и Епархие советым деж Солодков Андрей къыщеджащ «богословско-практические аспекты противосектантского служения: оккультизм, неоязычество, восточные движения» лекцэм.
Курсхэм хэтхэр тепсэлъыхьащ суд зытращӏыхьахэр члисэм и щэхухэм зэрыхэтым, суицидхэр къэмыгъэхъуным, дзэ операцэ хэхар щекӏуэкӏ щӏыпӏэм кӏуэхэр псэкӏэ гъэшхэным, УИС-м и лэжьакӏуэхэм я узэщӏыныгъэ лэжьыгъэм.
Гулъытэ щхьэхуэ хуащӏащ пэӏудзауэ технологиехэмкӏэ псэкупсэ щӏэныгъэ зрагъэгъуэтыну ӏэмал зэраӏэм. 2025-2026 гъэхэм УИС-м и ӏуэхущӏапӏэ зыбжанэм щекӏуэкӏащ суд зытращӏыхьахэм «чристэн диным и лъабжьэхэр» курсыр джынымкӏэ пилотнэ проектхэр.
Дерсхэр щекӏуэкӏкӏэ дин-лэжьакӏуэхэм упщӏэхэр ятырт, пастыр ӏуэху бгъэдыхьэкӏэм щыщ ӏуэхугъуэ гугъухэр зэпкърахырти, къулыкъум и зэфӏэкӏымкӏэ зэдэгуашэрт.
Еджэныр къыщаухым абы хэтхэм я щӏэныгъэм щыхагъахъуэ курсхэр зэрекӏуэкӏамкӏэ тхылъхэр къаӏэрыхьащ.