Кисловодск шахарны Православ Свято-Никольский классика гимназиясыны биринчи классчылары К.Э. Циолковский атлы Эресейни космонавтика академиясыны академиги, СССР-ни Кърал премиясыны лауреаты, техника илмуланы кандидаты Игорь Габелко бла тюбешдиле.
Игорь Николаевич джашлагъа джерни биринчи ракеталары бла спутниклерини юсюнден хапар айтыб, спутникле Интернет сетьни ишин къалай баджаргъанларын ангылатды.
Гимназиячыланы къонакъны ракета-космос бёлюмде этген ишини юсюнден хапары сейирсиндирди. Игорь Габелко ракета-космос техниканы сынауларына къошулгъанды, борт радиотехника системаланы чыгъарыугъа автор къарауну къураугъа башчылыкъ этгенди эмда санагъатны баш конструкторларыны советлерини ишине къошулгъанды. Ол тогъуз илму иш джазгъанды эм чыгъармалагъа 12 автор шагъатлыкъ алгъанды.
Биринчи классчыла Юрий Гагаринни учуууну, космос аппаратланы джибериуню, кюн энергияны, ай бла кюн тутулууланы, башха планеталыланы эмда къара тешиклени юсюнден соруула бергендиле.
Эм тири тынгылаучулагъа Игорь Николаевич космонавтика Федерацияны шарик къаламларын эмда Роскосмосну значокларын саугъа этгенди.
Тюбешиуню аягъында классны тамадасы Шевченко Мария къонакъгъа билим берген хапары ючюн разылыгъын билдириб, джангы тюбешиулеге ышаныуун билдирди.